( ماشية حمده ) – الشاعر/ معوض حلمي ( الفلاح الفصيح ) .. مصر

( 1 )
كات تسهر جنبي بطول الليل
وانا قاعد اذاكر ف كتابي
كات تدعي يارب بصوت ترتيل
تحفظ وتبارك أحبابي
كات لسه الدار بالطوب الني
وتنادي الرايح والجاي
أم الوش الطارح ضي
في المندره وتلم صحابي

( 2 )
كات تفرح لما تلبسني
مريلتي وتشيل كتوباتي
كات تمشي ورايا تونسني
وانا رايح مدرستي باهاتي
كنت باشوفها جناح يتمد
ضد الحر وضد البرد
كات تطرح في عيداني الورد
وتطبطب على روحي يوماتي

( 3 )
كنت انزل وياها الحاره
كات أزهـد م الزهــد وحامده
والجـار بيـنادي الجـاره
ويشوفوا ياناس ماشية حمده
كان حضنها دايما مفتوح
في إيديها البلسم بيفوح
بيطيب أوسـعها جروح
كات زي العود الزان جامده

( 4 )
ماكانتش ترد في أي غريب
كات تفتح باب الدار للضيف
ماراحتش مدارس ولاكتاتب
وبتكره في المخاليق الزيف
ماكانتش بتقعد وياهم
كات بتخاف لايطولها أذاهم
لو عدت ع الناس اياهم
كات بتسمي تقول يالطيف

( 5 )
كات ستي مصاحبه العصافير
وبتزرع جواهــم فرحه
اول ماتعدي ينادوا لبعض
حمده ام الصوت الناي سارحه
وتغني مع النسمه غناها
يتلـموا ويردوا وراهـا
ع الجسر الدايب ف هواها
لابسه الشال وعليه الطارحه

( 6 )
ماكانتش تسامح أبداً أبدا
ولاكات بتفوت أي حساب
لو إيجوا قالولها إن معوض
قل ف أدبه ياحمده وعاب
كات تحلف وتقوم وخداني
على وسـط الدار الجواني
وتملــص بإيديهـا ودانــــي
وتقولي يموت الواد لو خاب

( 7 )
كات تحلـف لازمــا تعاقبني
وتلعن خاشي بعلو الصـوت
لكن نن عينيها ان شــافني
وحس بخوفي بيطرح توت
كان حضــنها روح تتحـــس
وتصد الشر إن جالي وعس
وتلملم حتى خيوط الشمس
وتغـزل ليا الفــرح بيــوت

( 8 )
ماكانتش تنام زي النسوان للصبح
كات تصحى وتكنس ف الشارع
وتفتح باب المقعد للديك
لاجل مايدن قبل الجامع
وتفرد نورها تقولش البدر
تهش الضلمه وترمي الندر
وتحني عينيها بأول خيط للفجر
ويروي نداها الورد الطالع

( 9 )
لو عدت ع الكوبري الفرعه
الساقيه بتلبس توب تاني
والبير بيناغش في الترعه
والمروى بيتعـبى أغاني
والنـخل بينزل ويمــيل
يتمشى كأنه ياناس عيل
مع سـتي بيقعد ويأيل
تحت الصّفصاف الحياني

( 10 )
ماكانتـش بتقـعد مـرتاحه
بتــداري وجعـها وبتصـره
وتربط على وسطها طرحه
مع ابويا وتسرح ع الكارو
إيدها ف إيده يوماتي معاه
خلقه الضيق كات عارفاه
ف نن عينيها وكات شايلاه
ورمشها ضله بتطرد حـره

( 11 )
أنا كنت باحب اسرح وياها
وافرد جنحاتي وراها واطير
كات زي الفرسه اما بتمشي
وبتسحر بغناه الطير
وان شافت زرعها بتلالي
وتصبح على ابويا الغالي
وان عطشت تطلع طوالي
تشرب م الترعه مش م الكولدير

………………………….