(أبين زين) – الشاعرة/ جيهان النجار .. مصر

أبين زين…… 

واوشوشني

واصارح نفسي وادوشني

فينكسف الودع ويشوف خطوط متكعبلة في كفوف

يبص ف وشي

وف إيدي

يجيب وجعي وتنهيدي

أتاري الحظ على روح الألم ملفوف .

يخلي عنده حبة دم

يقول ياواد يا حظ اتلم.. ولا في كسوف

في سكة سفري لعيونك واخدني لفين

أبين زين..

وبقرا القلب قبل العين ..

أبين كل شيء مجهول

واقول لنفسي قبل ما اي حد يقول..

بلاش الحب ..

أصل الحب مش معمول لأمثالك.. وله ناسه ومحناش من مقام حضرة جناب  سيدنا إحساسه

أبين زين..

ومكتبولي على جبيني مانيش سالمة

في دولة حبك الظالمة .. واخدني لفين . أعيش وكأني م الكراكيب !

وفاكرة نفسي م المحاسيب !؟

أتاري العشق مالكني ورافض إنه يعتقني

أنا مملوكة صدقني

ومش راضي لقلب يسيب وانا من قلبي محرومة ماليش فيا ولا أيتها معلومة

ولو مرة أحس بشوق لأحلامي أفوق على خبطة من شومة

وتقسم عمري انا نصفين

أبين زين..

ومش شايفة لاني بجد والله العظيم خايفة

لأن الحب عايز قلب له وحده

وأنا قلبي على ناصية

يطل ع الأمل  لكن يلاقي اليأس

م الجهتين .. أبين زين .

………………………