( بيني وبينك ) – الشاعرة/ شيماء عزت .. مصر

   (1)

–   ماشيين ع   الحبل

 خط بيفصل بين السما والأرض..

 فَتحت عنيّا لقيتِك وردة..

تجري عليها الفراشات..

تحلم بعبيرها ف لحظة مد

أنا بامشي  على الحبل بخفّه

وباقف على رِجْل ورِجْل

بالْعَب بكُوَر

ألعب بمضارب”بينج”..

أنا مش هاتعبّد ضلّك يوم

وموافق اوقع نفسي  أموت

من غير ما استنى تشاور لي

من غير..

 ما استنى عنيكِ تقول لي حاجات

ترميني ف دوّامه لوحدي

بايديّا بَلِف أطواق..

وانا صالب نفسي عشان..

 ماتُقعش

(2)

–  تناولني الطوق

   ع الحبل باحطه وبامشي عليه

   خطوة لقدام

   واتنين لورا

   بالعب بكور

طول عمري حركتي ف طوق

كان نفسي أفرد شعري

وأسيب فستاني يطير

مين قالّك إني سعيدة؟

من صغري باعيش جوّه الزهريّه..

يسقوني لوحدي

بأكبر وحدي

طول عمري بَابُص من الشباك

وعيال الشارع تتنطط

بينادوا لبعض بصوت عالي

باهمس لمدايا غنا وأحلام،

يبعَت لي أماني مع العصافير

يتشكّل حضن مابيدوبشِ ..

من صفارة إنذار

مين قالّك إنّي مابحلمشِ

بحبيب يعشقني بدون التاج

وياخدني معاه على ضهر الطير

أو نسكن قلب محار

بيدقدق فوقنا الموج أنغام

ماشيين ع الحبل وْمش عارفين ..

بيوصّل فين

إلحق !

دي خيوط الحبل بتتقطّع

طب ايه رأيك ..

تمسك إيدي

 يمكن ..

ننزل بسلام ع الأرض

أو لمّا نموت ..

هانموت مع بعض

 ……………………………