(كشف حساب) – الشاعر/ أشرف محمد السيد .. مصر

هات كراسة ، قلم و كتاب

واعمل جَرد و كشف حساب

دنيا و فيها النار و الجنة

صَفي النية ، سؤال و جواب

تزرع خير ، راح تحصد جنة

تزرع شر ، جحيم و عذاب

حاسب نفسك ، تُوب واستغفر

رب غفور و رحيم ، تواب

ظالم نفسك و لا مقصر

عُمرك يجري و شعرك شاب

كلمة حق ، تسامح ، رحمة

قلب سليم و الفعل صواب

لجل تفوز بالجنة استحمل

نهي و أمر ، ثواب و عقاب

خلي مرارة الصبر ، حلاوة

سيب أشرار ، اخيار أصحاب

عيش ف الدنيا غريب و فايتها

يا ما صحيح ، جُواه متصاب

نَضَف قلب و صحح نية

وارمي حمولك ع الوهاب

ارجع دايماً و اعمل وَقفة

أجر عظيم و عطاء و ثواب

دنيا غرورة و كل ما فيها

موت ، حرمان وفراق و خراب

حاسب نفسك ، تُوب واستغفر

مال بيروح و قصور تتساب

ضَعف ، غريزة و شهوة و نزوة

صوت شيطان ، ظالم ، كداب

انصر دينك و اعبد ربك

وَحدوا ، مُسَبب للأسباب

طاعة ، يقين ، إيمان وفرائض

إجرُد واعمل كشف حساب

كشف حساب خليه متحَضَر

ذنب بتوبة ، هيبقي ثواب

إحصُر عملك ، خيرك ، شَرَك

جنة و ليها ، تمان أبواب

دنيا دنيئة ، بلاش تطلبها

شوف كام واحد فاتها وساب

سيبها لغيرك ، قُوم طلقها

فِكر رشيد من غير إطناب

مهما يطول العُمر ، هترحل

لازم ترجع ، بعد غياب

بعد الموت هتقابل ربك

حاسب نفسك قبل حساب

………………………….