(أنا معاك) – الشاعر/ خالد الكعبي .. الإمارات

يعلك ياخلي بالفرح طبت
وتضوي على أفراحك شموع
انا معاك ان خفت وارتبت
أشيل منك الخوف والروع
اطلبت وصلك خلي اطلبت
اذا وجودي هوب ممنوع
ما تشوفني في حبك انصبت
وانا في قلبك صرت مزروع
حبك نبت في خافقي نبت
بالسمت والعادات والطوع
وانت الذي لي السعد يبت
صيتك على العربان مسموع
ربيت انا في حبك وشبت
في يوم حب الغير منزوع
وعن حب غيرك م العرب تبت
لو يذرفون بحبي دموع
اوجزت لك بالشعر واسهبت
ديوان حب وشوق مطبوع
لَعَبْت في عذالي لْعَبْت
خليتهم والكل موجوع
رحبت بك يازين رحبت
واهديت لك من وردي الفوع
ان كنت حاضر او بعد غبت
في القلب لك مسكان مصنوع
ياللي بعادك يجلب الكبت
وشوفك يفك الشوق والصوع
خلك معي م السبت للسبت
يعني طوال ايام الاسبوع

………………………