( أجّل دموعك للشتا ) – الشاعرة/ منى حواس .. مصر

1

أجّل دموعك للشتا

وامّا السما تحزن

اخرج وعيّط زيّها

واغسل في حزنك دمعها

وإياك صحابك يلمحوك

وقت الدموع مابينفعوش

وإن كان عليك م الدمع دين

وقت الوجع مايسدّدوش

ولايصدقوش الوعد في المحنة

حتى الصحاب اتغيّروا

فخبّي دمعك في المطر

ماتبيّنوش…..!!!

………………

2

كل شئ قسمة ونصيب

والنصيب ان دق بابك

سيب ملامحه ترسمك

وتقسّمك…..

إيد القِسم

حبّة حياة

حبّة وجع

حبّة فرح

حبّة دموع

حبّة رجوع للآخرة

دنيا بتقسمك

خُد نصيبك واحسبك

واضرب في نفسك مرّتين

واطرحك

من حاصل الجمع اللي قاصد

يقسمك

على شئ غريب

تلقى النتيجة

قسمتك

ومضاف إليها دمعتين

على خد راضي بالنصيب

…………….

3

اتهزمنا…..

والهزيمة المرة ديّا

مش في حرب

الهزيمة ف قلب مات

لمّا وضّوه بالسكات

والصلاة جوّاه حرام

كعبة محتاجة لإمام

والإمامة عطّلوها

حتى إسباغ الوضوء

والهدوء

ساد المكان

لحد مايلمّوا الجثث

ويرشّوا دمّك

في الميدان

………..

4

مستنّي ليه الفجر يدّن؟

ماعدش ينفع لك صلاة

التيمم جف أرضه

المية طالعة بالموتور

والموتور بالكهربا

والكهربا ماعادتش تيجى

غير في بيت الأوليا

مستني ايه؟!!!

……………………………