(يا مربيين الحروف فى زريبة الأغنام) – الشاعر/ مسعود شومان .. مصر

احتلوا روحها

ودلقوا فوق جسمها كياس الزباله

وسابوا مواليدها اليتامي

يلحسوا بواقي العلب

قدامهم الشاشات بتبلع صغار الآلهه

وينزلوا نسخ نسخ من مكنه لون السما

يا لحاسين الجزم

يا مربيين الحروف في زريبة الأغنام

وآكلين رمم القصايد في الصواني البلاستيك

نسخ نسخ والمكن داير

حيران في وسط القش وجبال الحصي

والخوف دواير دواير

مكسوف والدم بينقط من ضوافر شبح

إيه اللي مجروح يا قلبي

ومين انجرح

يادى السبق علي غيطان العار

يادى الكلام المستعار

في البق

في الودان

في الذاكرة الملسوعه بالهوا والنار

جثث بتتعرف علي هدومها

علي الطريق للدار

علي لحسه طازه من جبال المرار

علي ورق بيفر ورا بعضه

خلا كلاب الدنيا يرسموا صوتهم ويتباهوا

غرقان في شوقك لابن كار الحزن

اللي فهمها في البيوت الطين

واللي عشقها بالحنين للجرن

واستني قلبه يستوي في الطل

وعرف دموعه لما فات الضل

فرق كلامه ويا فرط العنب

صرخ في حضن السكك والغنا في لسانه

احتلوا روحها

ودلقوا فوق جسمها كياس الزباله

سابوا مواليدها اليتامي

يلحسوا بواقي العلب

وسابوه لوحده يكمل السوره

ويبشر الميتين اللي عاشوا عمرهم في الترب .

…………………….