(ولسه ولادنا علي السكه) – الشاعر/ محمد مصطفي الهلالي .. مصر

وفات خولي

ومات خولي

وجه خولي

ولسه ولادنا علي السكه

*******************

مفيش فى روايه الشهدا

حكاوي تتحكي تاني

ولا في نهاية الرحله

صبايا وحلم وأماني

ولا أهل البلد ينسوا

صباح أغرب من الغربه

وعنوان الهموم موال

بيتغني على التربه

ياقبر

ساعات تساع واحد

ساعات تانيه تئن براح

محدش ف النهار داخل

لكن ف الليل نرص جراح

بنات زي الورود تضحك

وتتمايل على الاغصان

على جسر الطريق ماتو

وفاتوا ف الغيطان فستان

وبنت بوشها المرمر

وكحلة عينها بتنور

وكات بتغني لواد اسمر

وخارجه تحصد الالوان

كانت بتغني ياهادي

ووقت الموت بقت قطفه

لعنب الخولي والوالي

وكل صباح كات شمسك

بتطلع فوق بيبان الدار

بيصحو بنات ويتهادو

ويرجع م العرق قوتهم

ايديهم قابضه ع المشوار

عشان ملاليم وحق كريم

بتخرج تقطف البساتين

وتفرح بالغدا الكاشف

لحالة بؤس ف المناديل

وبيلمو جراح قوتهم

وتتلغبط ملامحهم

وماتو ولسه قدامهم

ايدين الفقر

بتلاحق مراكبهم

مفيش ف قلبنا رحمه

ولازم في خطاوينا

تموت أحلام

تموت زهره غناوبنا

ولسه الفقر ع الطرقات

بيحصد احلى ما فينا

وينعينا فقير الحال

………………………….