(بيتفرج اكتر) – الشاعر/ عمرو العزالي – مصر

بيتفرج اكتر

ساكت اكتر

بينام أكتر

مشاويره على وضع الطيران

مشغول جدا وتليفونه مش في ايديه

وبيصاحب وبيكتب شعر بالخبرة.. الاتنين!

بقى بيعدي مواقف من غير ما يعلق

ومتصالح مع فكرة إنه إنسان صعب

كان ممكن مثلا يبقى فيل

او جزرة

او اي حاجة سهل تترسم..

او درابزين سلم

شاهد على كل اللي مسح بؤه وهو طالع

من روچ أو بواقي أكل أو ريحة سجاير

ابن بار

للربا والتواشيح

والسلفيين والرقاصات

وافلام الابيض والاسود بعد الضهر

في صالة بيتهم

ولكل مقررات التسعينات وتليفزيون الدولة

كمان كان ممكن يكون طفل فقير لأب مسجون

بيغني دايما في اي مكان ممكن يكون لوحده فيه

او وسط اصحابه اللي ما يعرفهمش مثلاً

صوته مش حلو ومش منفر

بيروح يقدم في معهد موسيقى عربية

وبيترفض والمختبرين بيهينوه تقريبا

بيعيط مع واحد صاحبه في العربية

وبعدها بيظبط شعره في المراية وبينزل

عشان يعمل نمرته في الفرح

بيرسم على كبوت العربية كف مستنيه يطبطب على ضهره في نص المشوار

بيصدٌق أقل

وبيعيط أقل

وبيتفرج في تليفونه على صور واحد

تليفونه على وضع الطيران ومشاويره مش في ايديه

………………………

اللوحة للفنان السوري/ محمد غانم