(بلاغة) – الشاعرة/ عائشة الشحي (العاطفة) .. الإمارات

ما كلّ كلمة حقّ لازم تقولها
ولا كلّ دمعة عين يسهل نزولها

نصّ البلاغة صمت عن منطق الهوى
ونصّ الثبات بعبرةٍ حبس لولها

والنفس بيدينك تروّض وترتكز
عاد أنت ميّز حرفها من ذلولها

إمّا تعزّك بين ناسك وتحشِمِك
ولّا تنزّل من مقامك فعولها

حاول تكون الحازم وإلزم العقل
ولّا ترى سلوم العرب منت حولها

فلا تحكّم بالمشورة نعم ولا
سمعتْك ميزان وتوخّى حمولها

وإن شحّت مزونك وجفّت مرابعِك
لو من بعد حينٍ ترقّب هطولها

لله شكواك وتخبّط مشاعرِك
مشاكلِك في ثلث ليلك حلولها

والناس ما توقف عشانك حياتها
لو قربها منّك بيرضي فضولها

من لا عطاك مْن المحبّة مشاعرَه
ما هو غصب عنّه تحاول تنولها

ومن لا يشوفك في حياته شريك له
سلّم له الدنيا عرِضها وطولها

هذي سنين العمر تمضي شرا الوهم
لا تنخدع فيها .. تغانم فصولها

(وإن شاكتك شوكة فتكفير عن خطا)
قد قالها شفيع الأمّة .. رسولها

وأنا تجرّعت الصبر حدّ الاكتفا
ومدام لي بالشعر كلمة بقولها:

من لا صفى لي في حياتي وباعني
وأبوابنا غلّق وسلّم قفولها

وخلّا خفوقي بين نارين يشتعل
وكمّل على روحي وسبّب ذهولها

هالدمعة المتعلّقة في طرَف هدب
يحرم عليه يخيل مشهد نزولها

………………………………