(ملبوس وعايش دور امام) – الشاعر/ هيثم منتصر .. مصر

لسه قلبي مستواش

لسه روحي عجين بيخمر

الدموع تنزل بلاش

والحكايه فيها فصل أكيد هيكمل

مسرحيه بطلها واحد

شخص يشبه ضحكته

مع انه كومبرس الحقيقيه

والفرحه تاركه سكته

ساعة ماينفتح الستار

تلقاه في ركن الخشبه وجهه منكسر

والضوء عليه ساطع

منقوع حياته في الخطر

والطريق قدامه قاطع

اول مايتحرك من بؤرته المليانه شوك

يظهر عليه البؤس.. والتقل كان هيموته

تسقيف يصم ودانه فمايسمعش صوت تلقين

الدنيا واقفه وراه طول عمرها

بتزق فيه الحين

شايف طشاش حبة رؤوس فوق الجتت

مناخيره شمت في العطور ريحة عتت

اتسمرت رجليه

ومساعد المخرج ينادي عليه

كمل يابطل

ودانه من كتر الطنين سمعت هطل

اتبعترت كل ابتساماته علي الجماهير

بالعافيه شد همومه مع رجليه

رجع لنفس النقطه ثم انكمش

ومساعد المخرج بيسأله ليه

اطنان من الافكار علي دماغه

-أنا ابقي مين؟..

-ايه اللي جابني ياوطن في الحته دي ؟

-ودوله مين .. ودوله مين ؟؛

-ودا ايه اللي أنا واقف عليه؟..

– وان كان دا بيتنا اولادي فين ؟..

-فين زوجتي فين والكام سرير والدولابين؟

اوووه ع الحياه لما بتدي ضهرها وتمسك شمال

وأنا ابقي وحدي في اليمين

– دنا في مسرح .

-طاب مين بطل ومين هيلبس دور …؟..

-اوووه دا مفيش معايا حد تاني

-يبقي الحكاية كلها قايمه عشاني

-طاب ايه بداية المسرحية

-اه التحيه

-طاب بعدها

-احكي حكايتي والسلام

ملبوس وعايش دور امام

………………………..

اللوحة للفنان المصري/ طارق الشيخ