(مع ستي) – سيجال بين الشاعر/ معوض حلمي الفلاح الفصيح – والشاعرة/ شيرين عبد السلام .. مصر

معوض:

لو عـدت ع الكـوبري الفـرعه

الســاقيه بتلبــس تـوب تاني

والبير بيناغــش في الترعــه

والمـــــروى بيتعـــبى أغــاني

النــــخل بيـنزل ويمــــــــــيل

يتمــشى كأنه ياناس عيــــل

مـــع ســــــتي بيقــعد ويأيل

تحـــــت الصّفـصاف الحيـاني

لو عـدت ع الكـوبري الفـرعه

السـاقـيه بتلبــس تـوب تاني

……………………

أنا كنت باحــب اسرح وياها

وافرد جنحاتي وراهـا واطير

كات زي الفرســه اما بتمـشي

وبتســـحر بغنـــــاها الطـــــير

وان شــافت زرعــــها بتــلالي

وتصـــبح عـــلى ابويا الغــالي

وان عطشـــت تطــــلع طوالي

تشرب م الترعه مش م الكولدير

كات زي الفرســه اما بتمـشي

وبتســـحر بغنـــــاها الطـــــير

…………………………………

شيرين:

من قلب الريف

تغزل مواويلك وتغني

ويمر النبض كأنه الطيف

وبتحكي القصة ف حدوتة

وبدم خفيف

ستك دي البطلة ف حكاياتك

وكأن الوقت وقف وياك

مع طلة شوق جوا عيونها

بتلاغي الدنيا ف تفاصيلها

وتفوق م الحلم فيعلى صداك

وتدندن أحلى موسيقى هواك

مع ستك حمده وحواديتها

على شط أصالة بعرق الريف

واقفة بدعوتها بتستناك

بتخطي كل الصعب معاك

وتجيب م الحلو ف أيامها

وتعطر بيه أرضك وسماك

وتعيش م العمر تغنيلها

على نغمة تون يحلو غناك

…………………….

اللوحة للفنانة المصرية/ ريم عبد الناصر