(عيد المجد) – الشاعرة/ الشوق طير “فدا الهيل” .. قطر

فالتفرحي يا ديرةً عزها دوم
يوم ان عيد المجد اعلن قدومه
تلبس له الدوحه اكاليل وهدوم
عنابيً متشبعه به هدومه
اسس لها جاسم قوانين وعلوم
حيا نبا جاسم وحيا علومه
سلم تميم المجد لوحن ومرسوم
خذها بقوه ماتراخت عزومه
صقر الفعايل رافع الراس زيزوم
تاريخه الناصع وبيضاء سلومه
وشعبن على يمناه زحازيح وقروم
حاشا عليهم عيب شعب وحكومه
السيف والشلفا مع كل مضيوم
والذيب له قومه وهو ذيب قومه
هذي قطر ماتقبل رخاص ورخوم
ماتنجب الا اسياد منذ النعومه
كنا ومازلنا لها الامس واليوم
هي للخليج دره وغصة خصومه
وحنّا عطيناها من الروح مقسوم
لين امطرت واعشوشبت من غيومه
لاكنها شوكه على كل حلقوم
من ينتقص منها تجرع سمومه
على الحمى كم من بطل حر شغموم
عيون حر الطير ترعى نجومه
يارب تحفظها من الشر والسوم
مظلومةً كانت قطر او ظلومه

………………………….