(على شَعّره) – الشاعر/ ياقوت مهران .. مصر

هي على شعره
و بتتلكك ضعيفه
وليها اسبابها
اللي تخليها تضعف

وعكس اللي بتقوله
اللي حساه
خفيفه
باين عليها انها بتألف

انا مش ح الومها
على اسلوبها
ولا ح اقول اني خطير

و لا ح ا فهمها
و لا اكديها
و لا ح اقول الحقيقي غير

هي رافضه قربي ليها
وتزعل لو اتغيرت عليها
و تفرض حدود ما قربش ليها
و اشوف عنيها انا ساكن فيها

و ساعات تقولي ب اكره كلامك
والاقيها اول حد يسمع لي
و تعود تقولي الزم مكانك
و بايدها تجرجرني تقربني

هي رافضه كل حاجه
تكون لها وجنبها
و ده اللي واضح؟

ولا عايزه
اللي يكسر قلبها
ويخاصمها
و يعند يقاوح؟

سؤال اجابته سهله
وبسيطه
بس اظنها عندها
دي مسأله
عايزه نيوتن يحلها

……………………..