(أفرش لك العين) – الشاعر/ عبدالرحمن بن شاهين المضاحكه .. البحرين

أفرش لك العين ولّا ودّك الحاجب

 ولّا الرموش الظليله تحتمي فيها

يا أحوَر العين لأجلك نعمل الواجب

 دمعات عينك ندى تنزل مآقيها

عينيك تنفث سحر يالحاضر الغايب

 عزّي لمنهو تأمّل في معانيها

لغة عيونك تمر و تلهم الكاتب

 ويكتب روايات لا يمكن تناسيها

يفز لك كل قلبٍ شاب مع شايب

والألقاب تعجز تعيّن اسم يزهيها

ان قلت شمس اعترض دمع القمر ساكب

 انتي الكواكب من أولها وتاليها

انتي العسل سكّره فيه الحلا ذايب

ما صار مثله أبد طعمٍ يحلّيها

عجزَت حروف القصيد وماني بجايب

 وصفٍ يليق بجمالك أو يسمّيها

يا قيس تكفى أعرني وصفك الصايب

احترت يا قيس بأي إبداع أنهيها

………………………………..