( سابها ) – الشاعرة/ علا بركات .. مصر

سابها؟

يبقى فيها عِلة

هي سابت؟

فيها إنَّ

هي هي.. وده المنزه

لا يُعاب ولا عنده زلة!!

مجتمع عادل بطبعه

والتدين فيه سجية!

مجتمع لا الظلم طبعه..

ولّا سلب الحق غية!

مجتمع معلول في حكمه

م الأزل طغيانه صايبه

أي تاء تأنيث مسبة

والمذكر لا يعيب!

المذكر ماشي حاله

حتى في الكوتشينة يكسب

هو رضي الله عنه

لا يُلام ولا عمره يُسأل

هو أصله يا ست راجل

هو راجل وأنتِ قِلة

هو راجل م التقيل

مسئولية وبيت.. يشيل

مش مفرط.. مش مراوغ

مش بيغدر أو يخون

وأنتِ إيه قيمة ثباتك

ولّا قيمة يعني ذاتك

ولّا حقك إيه يا حلوه؟!

حكمهم قبل المداولة

كله مضمون بالملاوعة

كله محسوب بالقانون!!

……………………………